Duke filluar nga 19 maj, shteti i New York-ut do të heqë kufizimet për tifozët e imunizuar të ekipeve lokale të bejsbollit, Mets dhe Yankees, duke u kushtuar atyre seksione të veçanta në tribunat e stadiumit. Ata që vaksinohen gjatë një ndeshjeje do të marrin gjithashtu një biletë falas për të shikuar ndeshjen e radhës.
Ditët e fundit, ritmi i fushatës së vaksinimit është ngadalësuar, jo vetëm në New York, por në të gjithë Amerikën, nga 3.3 milion në mes të prillit, në 2.2 milion sot. Kurba në rënie është shumë shqetësuese, pavarësisht përpjekjeve.
“Joshja” e skeptikëve të vaksinës ka nisur tashmë në shumë shtete, përmes programeve specifike.
Të pavaksinuarve po iu ofrohen birra, sanduiç, bileta në muze. Të gjitha këto, falas. Madje, edhe marijuanë, në ato vende ku është legalizuar.
Me pasaportën e vaksinimit, banorët e New Jersey mund të shkojnë në një nga 13 birraritë lokale dhe të marrin atje një birrë dhe sanduiç falas. Nga ana tjetër, ka shumë kompani që kanë vendosur të ndihmojnë fushatën e vaksinimit, duke e përdorur atë si një mundësi për të marrë një publicitet, duke tërhequr klientë me metoda jo-konvencionale.
