Nevojat për gjak në vendin tonë mbeten ende shumë të larta. Këtë e bëri të ditur edhe presidenti i Kryqit të Kuq i cili tha se në Shqipëri duhen rreth 60 mijë qese gjaku ndërsa aktualisht plotësohet vetëm gjysma e kësaj sasie.
“Plotësimi i nevojave me gjak është një sfidë qoftë për shtetin qoftë për Kryqin e Kuq. Nuk është e mundur që një aktor të realizojë plotësimin me nevoja për gjak. Janë kryesisht talasemikër që kanë nevojë për gjak cdo tre javë. Përvec kësaj janë edhe personat me nevoja për të kryer operacione. Në vendin tonë duhet rreth 60 mijë qeska gjaku. Realizohen afërsisht tek gjysma, por sidoqoftë rëndësi ka që ky numër nga viti në vit rritet. Sa vjen dhe ky ndërgjegjësim rritet gjithmonë e më shumë”, tha Ylli Alushi, presidenti i Kryqit të Kuq.
Periudha kur nevoja për gjak është më e madhe është vera, kryesisht për shkak të shtimit të aksidenteve.
“Nëse do të flasim për periudhën e verës duke qenë se qarkullimi i automjeteve, njerëzve është më i madh, numri i aksidenteve është më i madh dhe nevojave në këtë periudhë është më i madh. Megjithë se nevojat janë të larta gjatë gjithë vitit”, shtoi Alushi.
I pranishëm në aktivitetin e organizuar në kuadër të ditës botërore të dhurimit të gjakut ishte edhe ambasadori i Spanjës në Shqipëri i cili përcolli një mesazh sensibilizues
“Dhurimi i gjakut është një gjest shumë i rëndësishëm dhe një akt bujarie, sepse shpëton jetë. Qëllimi ynë është të nxisim dhe të promovojmë pjesëmarrjen, në mënyrë që sa më shumë njerëz të bëhen pjesë e kësaj iniciative”, tha Gabriel Cremades, ambasadori i Spanjës në Shqipëri.
Edhe pse vitet e fundit numri i personave që dhurojnë gjak është rritur ndjeshëm, nevojat vazhdojnë të mbeten shumë të larta.
