Kajl Uoker ka vendosur që të mbyllë karrierën e tij me ekipin përfaqësues, një vendim që e ka bërë publik tre muaj para zhvillimit të Kupës së Botës, ku padyshim nuk do të ishte protagonist me “tre luanët”. Anësori i djathtë i mbrojtjes, ka dalë nga preferencat e Tomas Tuhel dhe shanset për të që të grumbullohej ishin minimale.
Kësisoj, futbollisti 35-vjeçar, i cili aktualisht aktivizohet me Bërnlin në Premier Ligë, ka vendosur që të largohet nga përfaqësuesja, me të cilën ka luajtur 96 ndeshje. E fundit ishte ajo ndaj Shqipërisë në marsin e vitit të kaluar, e mbyllur me shifrat 2-0 për ekipin anglez.
“Të luaj për Anglinë ka qenë gjithmonë nderi më i madh i karrierës sime. Sa herë që e vishja fanellën, kjo do të thoshte shumë për mua dhe familjen time. Pas shumë mendimesh, e ndjej këtë si momentin e duhur për t’u larguar dhe për t’i lejuar brezit të ardhshëm të lojtarëve të dalë përpara.
Largohem jashtëzakonisht krenar për udhëtimin dhe mirënjohës ndaj çdo trajneri, shoku skuadre dhe mbështetësi që ka qenë pjesë e tij. Të përfaqësosh vendin tënd është gjëja më e madhe që mund të bësh në futboll dhe ato kujtime me Anglinë do të mbeten me mua përgjithmonë”, tha Uoker në komunikatën rreth vendimit të tij.
