Cristiano Ronaldo një “makineri”/ Shënon 3-golësh në fitoren e Al Nassr
Cristiano Ronaldo vijon të mahnitë me paraqitjet e tij, duke qenë sërish protagonist në një fitore të rëndësishme të Al Nassr. Skuadra saudite triumfoi me rezultatin 5-3 ndaj Al Kholood, në një ndeshje spektakolare ku vëmendja kryesore ishte te ylli portugez.
Kapiteni i Al Nassr realizoi tre gola, duke dëshmuar edhe një herë instinktin e tij të jashtëzakonshëm para portës. Përtej suksesit të skuadrës, kjo paraqitje e afron Ronaldon me një arritje që do të përbënte një moment historik në futbollin botëror.
Me tregolëshin ndaj Al Kholood, Ronaldo arrin në 985 gola në karrierën e tij, duke qenë vetëm 15 realizime larg shifrës së jashtëzakonshme prej 1,000 golash.
Në moshën 41-vjeçare, portugezi vazhdon të tregojë se mosha nuk e ka ndalur ambicien dhe dëshirën për të thyer rekorde. Objektivi i tij i radhës është tashmë i qartë: të bëhet një nga futbollistët që arrijnë këtë shifër të jashtëzakonshme në karrierë.
Al Nassr feston tri pikë të tjera, ndërsa tifozët e Ronaldos presin me padurim golat e radhës, që mund ta çojnë edhe më pranë një prej rekordeve më të mëdha të futbollit.
