Shtetet e Bashkuara të Amerikës dhe Britania e Madhe i kanë bërë thirrje Arabisë Saudite që të hetojnë në mënyrë transparente mbi zhdukjen e gazetarit saudit Xhamal Kashoxhi në Konsullatën e Arabisë Saudite në Stamboll.
Gazetari, kritik i ashpër i princit Mohamed Bin Salman, nuk është parë më që kur hyri në konsullatë javën e kaluar.
Turqia beson se gazetari mund të jetë vrarë brenda konsullatës, por Arabia Saudite e mohon kategorikisht, duke shtuar se Kashuxhi është larguar nga ndërtesa. Policia ka bërë një hetim të thellë, por ajo nuk ka akses në kamerat e sigurisë së konsullatës.
Presidenti turk Rexhep Tajip Erdogan tha se zyrtarët saudit duhet të ofrojnë prova se Kashoxhi u largua i gjallë nga ndërtesa.
Gazetari kishte hyrë në konsullatë për të marrë një dokument divorci. Ai më pas do të martohej me të fejuarën me shtetësi turke Hatice Cengiz, e cila e priti jashtë për më shumë se 4 orë.
Vajza pohoi për mediat se gazetari i kishte thënë se nëse nuk do të dilte nga ndërtesa brenda 4 orëve, të njoftonte policinë.
Ndërkohë, ditën që gazetari hyri në konsullatë, në Turqi kishin mbërritur edhe 15 anëtarë të inteligjencës saudite, që mund të kenë lidhje me komplotin ndaj gazetarit.
Ndërkohë, e fejuara e gazetarit ka kërkuar ndihmën e presidentit amerikan për gjetjen e tij. Zyrtarë të shtëpisë së bardhë konfirmuan shqetësimin e Donald Trump për rastin, i cili nëse rezulton i vërtetë, mund të cenojë marrëdhëniet amerikano-saudite.
