Pas tre ditësh seance maratonë, Kuvendi i Maqedonisë së Veriut ka miratuar me 68 vota pro, asnjë kundër dhe asnjë abstenim, propozimin francez për kornizën negociuese të qeverisë me Bashkimin Europian.
Miratimi i hap rrugë nisjes së negociatave për Shkupin, por edhe Tiranën, e cila ishte peng e vetos së deritanishme bullgare. Vendimi u kundërshtua fortë nga VMRO-DPMNE, deputetët e të cilës braktisën sallën pak përpara votimit.
Sipas VMRO pranimi i propozimit francez kërkon ndryshimin e Kushtetutës dhe nënshtrimin e Shkupit ndaj kërkesave të Sofjes.
Gjatë fjalimeve të tyre në Kuvend, deputetët e opozitës akuzuan qeverinë për tradhti dhe shitje të interesit kombëtar, ndërkohë jashtë Parlamentit qytetarët e thirrur për të protestuar kundër propozimit vijuan te shprehnin mosdakordësinë e tyre.
