Ish-zyrtari i lartë i FBI-së Charles Mcgonigal u deklarua fajtor të premten për akuzën se kishte mbajtur të fshehur faktin që kishte marre 225,000 dollarë nga ish-oficeri i inteligjencës shqiptare Agron Neza si dhe takimet me këtë të fundit.
Ky pranim i fajësisë nga Mcgonigal erdhi si pjesë e një marrëveshje me prokurorët të cilët në këmbim, hoqën dorë nga 8 pika të tjera të aktpadisë.
Në një deklaratë të shkurtër në gjykatë, McGonigal pranoi se nuk i bëri të ditur udhëtimet apo pagesat me Nezën, të cilat i cilësoi si hua, sepse nuk mund të merrej me biznes personal gjatë kohës që punonte për FBI-në.
McGonigal argumentoi se ai dhe Agron Neza po planifikonin të fillonin një firmë këshillimi së bashku kur McGonigal të dilte në pension.
Ai pranoi gjithashtu kontaktet me kryeministrin, Edi Rama dhe këshilltarin jozyrtar të kryeministrit, Dorian Duçka.
I pyetur nga gjykatësja Colleen Kollar-Kotelly, nëse më 25 nëntor, ai kishte informuar Prokurorin e Departamentit të Drejtësisë për një hetim të mundshëm kriminal për një shtetas amerikan, që ishte regjistruar për të bërë lobizëm për një parti që nuk ishte e kryeministrit Rama, McGonigal u përgjigj “Po”.
McGonigal kishte marrë informacion për këtë lobist nga Dorian Duçka.
mediat amerikane shkruajnë se në akt-padi nuk identifikohet lobuesi amerikan dhe as partia shqiptare. Por më 14 nëntor të vitit 2017, lobisti Nick Muzin, depozitoi në Departamentin e Drejtësisë, dokumentet mbi aktivitetin lobues të disa muajve më parë për llogari të PD-së, i cili më pas është bërë subjekt hetimi në Shqipëri për origjinën e parave.
Vepra penale për të cilën pranoi fajësinë zoti McGonigal në Uashington, parashikon një dënim deri në 5 vjet burg, por për shkak të marrëveshjes me prokurorët dënimi do të jetë më i zbutur. Kushtet e marrëveshjes parashikojnë që McGonigal nuk ka të drejtën ta apelojë vendimin, i cili parashikohet të jepet në shkurt të vitit të ardhshëm.
