Kryetari i Partisë Demokratike, Sali Berisha, në komunikimin e tij me qytetarët, u ndal te protesta e zhvilluar prej 55 ditësh në kryeqytet, duke deklaruar se ajo nuk organizohet nga Partia Demokratike, megjithatë opozita do të vijojë ta mbështesë.
“Ne e ndjekim me shumë interes dhe vëmendje dhe do të bëjmë gjithçka për mbështetjen e saj. Pas përfundimit të gjithë procesit të brendshëm të partisë, do të riformulojmë agjendën në funksion të zgjedhjeve të ardhshme, në funksion të suksesit të protestës dhe largimit të Edi Ramës.”, tha Berisha.
I pyetur lidhur me çështjen e Belinda Ballukut, Berisha tha se SPAK nuk vepron në mënyrë të pavarur dhe se prokurorët që zbatojnë ligjin përballen me presion politik.
“Nuk preken sepse SPAK është nën kontroll të plotë të Edi Ramës. SPAK është seksion i Partisë Socialiste. Në rastin e Ballukut, siç e patë dhe ju, kur një prokuror vendosi të zbatojë ligjin, u përball me egërsinë e pakufishme të Edi Ramës, Lubi Ballukut dhe bandave të tyre. U përball me votën e 83 mandateve të krimit në parlament.”
Berisha hodhi akuza ndaj kryeministrit Rama për organizimin e koncertit të Kanye West.
“Edi Rama përdori kartonat e tij të krimit për të votuar në parlament dhuratën e parave që u grabiti pensionistëve shqiptarë, qytetarëve shqiptarë dhe për t’ua dhuruar ato miliarderit Kanye West.”
Lidhur me figurat e reja të zgjedhura në strukturat e Partisë Demokratike, Berisha tha se, ndonëse nuk janë të njohura për publikun, ato përfaqësojnë, sipas tij, një grup me vlera dhe profesionalizëm.
/vizionplus.tv
