Temperaturat e ulta të mbrëmjes së kaluar kanë krijuar probleme në aksin rrugor nacional Bulqizë – Peshkopi.
Segmenti i njohur si “Pishat”, dy kilometra nga qyteti i Bulqizës u mbulua nga akulli duke u bërë burim aksidentesh për të gjithë përdoruesit e rrugës.
Mjetet të cilat lëvizin për të herë të parë në këtë rrugë janë përballur me befasi nga prezenca e akullit, ku disa prej tyre kanë dalë nga rruga por fatmirësisht pa pasoja të rënda.
Ndonëse ky segment është gjithmonë problematik gjatë stinës së dimrit, ai nuk është kriposur nga firma mirëmbajtëse për të shmangur aksidentet.
Në këtë rrugë për shkak të akullit ka patur aksidente edhe me humbje jete njerëzore.
Ndërsa policia vazhdimisht këshillon drejtuesit e mjeteve të tregohen të kujdesshëm gjatë lëvizjes në rrugën Bulqizë – Peshkopi.
Vetëm pas pas problemeve në qarkullim ditën e sotme, firma ka nisur kriposjen e rrugës. /vizonplus.tv
