Një 31-vjeçar, punonjës i Policisë Bashkiake në Tiranë, është arrestuar pasi dyshohet se ka goditur me grusht eprorin e tij për shkak të detyrës.
Në pranga ka rënë Adi Hazizi. Sipas burimeve, ngjarja ka ndodhur pasi ai ishte transferuar nga një sektor në një tjetër. Pas marrjes së këtij vendimi, Hazizi dyshohet se ka shkuar në zyrën e shefit të Sektorit të Mbikëqyrjes së Territorit, Skënder Delija.
Burimet bëjnë me dije se mes tyre ka pasur fillimisht një konflikt verbal, i cili më pas është përshkallëzuar, ndërsa 31-vjeçari dyshohet se e ka goditur me grusht eprorin.
Nga ana tjetër, Skënder Delija ka pretenduar se dhuna ndaj tij ka ndodhur për shkak të detyrës, pasi ai i kishte komunikuar vartësit vendimin e marrë nga drejtuesit për transferimin e tij në një sektor tjetër.
Policia ka arrestuar 31-vjeçarin, ndërsa vijojnë veprimet procedurale për zbardhjen e plotë të rrethanave të ngjarjes.
