Kryeministri Edi Rama ndodhet në Estoni, me rastin e pjesëmarrjes në Konferencën Lennart Meri 2026, një nga forumet më të rëndësishme ndërkombëtare të debatit mbi politikën e jashtme, sigurinë dhe sfidat gjeopolitike globale, e organizuar këtë vit nën moton “Fati i favorizon të guximshmit”.
Ai mbajti një konferencë të përbashkët me homologun e tij estonez, Kristen Michal.
Michal deklaroi se Estonia mbështet fuqishëm zgjerimin e Bashkimit Europian dhe vijon të qëndrojë pranë Shqipërisë në rrugëtimin e saj drejt integrimit europian, duke theksuar se përparimi varet nga përmbushja e reformave nga ana e vendit kandidat.
“Shqipëria është një aleate shumë e mirë në NATO. Faleminderit për kontributin tuaj në sigurinë në rajonin baltik. Estonia mbështet fort zgjerimin e Bashkimit Europian. E kemi mbështetur Shqipërinë në rrugëtimin e saj drejt BE dhe do të vazhdojmë ta bëjmë. Vazhdoni të ecni përpara me reformat. Nëse Shqipëria përmbush detyrat e saj, edhe BE do të bëjë të njëjtën gjë”, u shpreh ai.
Ai vlerësoi gjithashtu rolin e Shqipërisë si aleate në NATO dhe kontributin e saj në sigurinë rajonale, ndërsa nënvizoi rëndësinë e bashkëpunimit dypalësh në fushën e digjitalizimit, inteligjencës artificiale dhe inovacionit, duke e cilësuar përvojën estoneze si një model që mund të ndihmojë në reduktimin e burokracisë dhe përmirësimin e shërbimeve publike.
“Vazhdoni të ecni përpara me reforma për të ardhmen e vendit dhe popullit tuaja nëse Shqipëria përmbush angazhimet e saj, atëherë edhe BE do të bëjë të njëjtën gjë. Fluturimet e drejtpërdrejta çelin mundësi të reja për turizmin dhe bizneset. Kemi shumë të përbashkëta, bashkëpunimi për çmimet dixhitale, interesi në rritje për AI.
Përvoja e Estonisë si vend dixhital tregon se teknologjia mund të reduktojë burokracinë dhe përmirësojë shërbimet publike. Nisma jonë e sapo prezantuar e AI është investim i rëndësishëm në të ardhmen e ekonomisë, pres me padurim të thellojmë bashkëpunimin për çështjet dixhitale dhe inteligjencën artificiale. Shqipëria ka një ministre për AI, Estonia duhet të ecë që t’ju kapë aty. I dashur Edi faleminderit për vizitën tuaj. Vitin tjetër shënojmë 25 vjet marrëdhënie diplomatike mes dy vendeve dhe besoj se bashkëpunimi do të bëhet edhe më i fortë.”, tha ai.
