Dy aksidente rrugore janë regjistruar në Vlorë gjatë ditës së sotme, ku si pasojë janë shkaktuar dëme materiale dhe disa persona kanë mbetur të lënduar lehtë.
Aksidenti i parë ka ndodhur në autostradën “100 Vjetori”, në afërsi të fshatit Panaja, ku një kamion tip “MAN”, i drejtuar nga shtetasi H. C., ka humbur kontrollin gjatë lëvizjes, duke dalë nga rruga.
Për pasojë, mjeti ka pësuar dëme materiale, ndërsa drejtuesi i kamionit ka marrë dëmtime të lehta. Nga verifikimet e kryera rezultoi se shoferi nuk ishte nën efektin e alkoolit, pasi testi i alkoolit shënoi 0.00 mg/l. Ai po merret në pyetje nga policia për zbardhjen e rrethanave të ngjarjes.
Ndërkohë, një tjetër aksident u regjistrua pranë Tregut të Çoles, ku një automjet tip “Nissan” me, i drejtuar nga shtetasi A. C., 53 vjeç, është përplasur me një motomjet tip “Yamaha”, që drejtohej nga shtetasi R. P., 74 vjeç. Në motomjet udhëtonte edhe pasagjerja Sofie Prifti, 73 vjeçe.
Si pasojë e përplasjes, drejtuesi i motomjetit dhe pasagjerja janë transportuar në Spitalin Rajonal të Vlorës për ndihmë mjekësore. Sipas burimeve, të dy ndodhen jashtë rrezikut për jetën.
