Policia e Tiranës ka goditur një rast të kultivimit të kanabisit në ambiente të mbyllura me llamba.
Si rrjedhojë e operacionit një person u arrestua dhe tre të tjerë u shpallën në kërkim nga uniformat blu.
Personi arrestuar është shtetasi Xh. L., 25 vjeç, banues në Tiranë. Ndërsa janë shpallur në kërkim shtetasit: D. A., V. A. dhe F. S, të tre banues në Tiranë.
Këta shtetas sipas policisë, kultivonin kanabis në dy garazhe në pronësi të shtetasit Xh.L., të cilat kishin dalje në tunele të ndërtuara gjatë diktaturës dhe që shërbenin si vendstrehime.
Gjatë kontrollit që uniformat blu ushtruan në garzhe gjetën dhe sekuestruan 242.6 gr lëndë narkotike të dyshuar Kokainë, e cila ishte ndarë në doza të vogla, 1 kg e 125 gr lëndë narkotike Cannabis në formë çokollate, fishekë luftarakë, 1 peshore elektronike, 3 motoçikleta, 1 DVR, rreth 600 shishe vere të llojeve të ndryshme, si dhe pajisje të shumta.
Po gjatë kontrollit të ushtruar në tunelet e gazrazhit u gjetën po ashtu pajisje të tjera, të cilat përdoreshin nga shtetasit e mësipërm për kultivimin e kanabisit në ambiente të mbyllura, si: llamba elektrike, ventilatorë aspirues, transistorë elektrikë, tuba alumini për aspirim, fuçi për mbajtjen e lëndës narkotike, me aromën karakteristike të Kanabisit, set automatesh dhe prizash elektrike.
Aksioni I policisë u ndërmor pas informacioneve të marra në rrugë operative nga sektori I narkotikëve në Tiranë. Ndërkohë që vijon puna për kapjen e personave të shpallur në kërkim si dhe evidentimin e personave të tjerë që janë të përfshirë në këtë aktivitet kriminal.
