Koreja e Veriut duket se nuk po tërhiqet nga programi I saj bërthamor pavarësisht paralajmërimeve të SHBA për vendosjen e sanksioneve ndaj saj.
Agjencitë e Intelegjencës së Koresë Jugore kanë njoftuar se koreano veriorët kanë nisur restaurimin e një baze, e cila në samitin e parë të zhvilluar mes presidentit Donald Trump dhe liderit korean Kim Jong Un u ra dakord që të mbyllej.
Agjencia Kombëtare për Intelegjencë e Koresë së Jugut ka bërë me dije gjithashtu se të njëjtat informacione i posedojnë edhe Shtetet e Bashkuara.
Imazhet e bazës u zbuluan nga satelitët dy ditë pas dështimit të takimit të dytë mes presidentit Donald Trump dhe Kim Jong Un.
Në samitin e dytë të zhvilluar SHBA refuzoi kërkesat e koreano veriorëve për heqjen e sanksioneve ndaj shtetit të tyre.
Megjithatë ministri i Jashtëm I Koresë së Veriut, Ri Yong Ho tha se delegacioni i tyre ka kërkuar që vetëm një pjesë e sanksioneve të hiqen dhe jo të gjitha.
