Katër vite pas nisjes së sulmit të gjerë rus ndaj Ukrainës, Kremlini njoftoi se qëllimet ushtarake të Rusisë nuk janë arritur ende dhe se «operacioni special ushtarak» do të vazhdojë. Nga ana tjetër, presidenti ukrainas, Volodimir Zelenski, deklaroi se Rusia nuk ka arritur objektivat e saj.
Sekretari i shtypit i Kremlinit, Dmitri Peskov, u shpreh se shumë nga qëllimet e Moskës janë realizuar dhe shtoi se qëllimi kryesor i Rusisë është të sigurojë sigurinë e njerëzve që jetojnë në lindje të Ukrainës.
Zelenski tha në një mesazh të regjistruar se: «Putin nuk arriti të realizojë objektivat e tij. Ai nuk i thyeu ukrainasit dhe nuk fitoi këtë luftë. Ne e mbajtëm Ukrainën dhe do të bëjmë gjithçka për të arritur paqen dhe për të siguruar drejtësinë. Duam paqe, një paqe të fortë, të denjë dhe të qëndrueshme».
Pak më herët, presidentja e Komisionit Europian, Ursula von der Leyen, mbërriti në Ukrainë për të shprehur mbështetjen e Bashkimit Europian me rastin e përvjetorit të pushtimit. Në një postim në X, ajo shkroi se dëshiron të dërgojë një mesazh të qartë tek populli ukrainas dhe agresori: nuk do të tërhiqemi derisa të rikthehet paqja.
Von der Leyen pritet të marrë pjesë, së bashku me presidentin e Këshillit Europian, Antonio Costa, në një takim trepalësh me Zelenskin, si dhe në një telekonferencë të “Aleancës së Gatshme”, ku marrin pjesë aleatë të Kievit.
/vizionplus.tv
