“Jeta e rrugës në Ballkan”. Kjo është ekspozita që pritet të çelet në muzeun e Arsimit Kombëtar në Korçë nga 30 fotografë të njohur ballkanas. Ekspozita vjen në kuadër të festivalit “Gjon Mili”.
Të 30 fotografitë e autorëve ballkanas janë të teknikës bardh e zi dhe mbi të gjitha shkrepjet janë të momentit, duke sjellë kështu një Ballkan të trazuar me të gjithë problematikën brenda.
Edhe për organizatorët, çdo shkrepje e autorëve ka brenda nga pak Gjon Mil. Ndoshta edhe për nga teknika e realizimit por edhe për nga problematika që ata kanë zgjedhur.
Një ekspozitë si kjo sipas organizatorit, Roland Beqiraj, askund tjetër nuk ri më mirë se në Korçë, në qytetin ku ka dhe rrënjët fotografi me famë botërore.
Për ekspozitën janë kujdesur së tepërmi Burim Myftiu, drejtori artistik i festivalit Gjon Mili, si dhe kuratori i kësaj ekspozite, Osman Demiri. Ata kanë gjetur mbështetjen e kryebashkiakut Sotiraq Filo.
Së shpejti Korça do të ketë edhe shtëpinë muze të fotografit Gjon Mili, atje ku vizitorët për herë të parë do të kenë mundësinë të shohin një pjesë të mirë të punimeve të fotografit me famë botërore.
