Një shpërthim ka ndodhur mëngjesin e sotëm në një pikë karburanti në zonën e Brrylit në Tiranë.
Sipas informacionit paraprak të policisë, dyshohet se ka shpërthyer një bombul gazi në momentin që një automjet po furnizohej me gaz.
Si pasojë e shpërthimit janë dëmtuar tre punonjës të karburantit, të cilët janë transportuar në Spitalin Universitar të Traumës për të marrë ndihmë mjekësore.
Tre të dëmtuarit, V. H., R. A. dhe A. XH., ndodhen në gjendje shëndetësore të stabilizuar dhe jashtë rrezikut për jetën. Aktualisht, ata po i nënshtrohen ekzaminimeve dhe vlerësimit të mëtejshëm nga ekipi mjekësor.
Nga shpërthimi është dëmtuar edhe një godinë njëkatëshe pranë karburantit. Në vendngjarje ndodhen forcat e policisë dhe shërbimet zjarrfikëse.
Grupi hetimor vijon punën për të përcaktuar rrethanat dhe shkaqet e shpërthimit.
