Pas debateve të shumta dhe tensioneve, partitë politike italiane kanë gjetur më në fund gjuhën e përbashkët për zgjedhjen e drejtuesve të parlamentit.
Pas 3 votimeve të dështuara, të cilat nuk arritën 2/3 e shumicës, deputetët dhe senatorët e parlamentit të ri italian në votimin e 4, kanë zgjedhur Roberto Fico, deputet i lëvizjes 5Yje si kryetar i Dhomës së Deputetëve dhe Maria Elisabeta Alberti Casellati në krye të Dhomës së Senatit.
Zgjedhja e një deputeti të Lëvizjes 5Yje në krye të dhomës së deputetëve të Parlamentit është një fitore historike e kësaj force politike, e cila mundi që brenda pak viteve të shndërrohet në një nga partitë kryesore e më të votuara në vend. Në zgjedhjet e 4 marsit fitoi rreth 37 % të votave.
Ndërsa zgjedhja e kryetares së Senatit erdhi pas debateve të forta mes forcave të koalicionit të së djathtës. Ajo është gruaja e parë ne historinë e politikës italiane që do të mbajë këtë post.
Pas zgjedhjeve të kryetarëve të dy dhomave të parlamentit të ri italian, rruga është e hapur për krijimin e qeverisë së re.
Nesër pritet që Presidenti i Republikës Sergio Mattarella të nisë konsultimet me të gjitha forcat politike, duke marrë më pas vendimin se kujt i takon drejtimi i qeverisë së re italiane.
