Agjencia e Mbikëqyrjes Policore ka publikuar bilancin e veprimtarisë gjatë muajit korrik 2026, duke raportuar dhjetëra procedime dhe ankesa të trajtuara, si dhe hetime ndaj punonjësve të Policisë dhe subjekteve të tjera.
Sipas të dhënave të AMP-së, gjatë muajit korrik janë kryer 54 referime në prokurori për 54 punonjës policie. Nga këto, 15 punonjës policie i përkasin nivelit të parë drejtues dhe 39 punonjës policie nivelit zbatues, ndërsa në 11 prej rasteve janë përfshirë edhe shtetas.
Në kuadër të veprimeve hetimore, 11 persona janë arrestuar në flagrancë, mes tyre 8 punonjës policie dhe 3 shtetas.
Sa i përket veprave penale, AMP bën me dije se gjatë korrikut janë referuar 54 çështje penale, të cilat janë klasifikuar sipas së veprave.
Në këtë listë përfshihen 14 çështje për shpërdorim detyre, 10 çështje për veprime të kundërligjshme, si dhe raste të tjera që lidhen me vepra penale të ndryshme, përfshirë veprat arbitrare dhe dëmtime të tjera me dashje e kanosje.
Gjithashtu, janë evidentuar 5 çështje për shkelje të rregullave të qarkullimit rrugor, ku përfshihen 4 subjekte dhe 1 shtetas.
Pjesë e bilancit janë ankesat e administruara , ku gjatë korrikut janë trajtuar gjithsej 111 ankesa të trajtuara, nga të cilat:
15 raste janë ankesa të bazuara;
62 raste janë ankesa të pabazuara;
32 raste janë ankesa që nuk provohen;
2 raste janë ankesa për të cilat është hapur dosje penale.
Përveç ankesave, AMP ka regjistruar edhe 160 ankesa administrative gjatë këtij muaji.
Gjatë muajit janë zhvilluar edhe 3 inspektime, nga të cilat një ishte i planifikuar dhe dy të paplanifikuara. Sipas AMP-së, inspektimet kanë pasur në fokus përmbushjen e detyrave dhe veprimtarinë e strukturave të Agjencisë.
Në të njëjtën kohë, Komisioni Disiplinor ka marrë vendime për disa punonjës policie. Për 6 punonjës policie është vendosur “fillimi i hetimit disiplinor për shkelje të rëndë”, ndërsa për 1 punonjës policie është vendosur “mosfillimi i hetimit disiplinor, pasi shkelja është parashkruar”.
