Linja ajrore Emirates po përdor Inteligjencën Artificiale (AI) për të parashikuar më saktë turbulencat gjatë fluturimeve, një problem që po përkeqësohet nga ndryshimet klimatike. Turbulenca shpesh është e vështirë për t’u shmangur, pasi nuk shfaqet gjithmonë në radarët e motit dhe ndodh në mënyrë të papritur.
Sipas një studimi të Universitetit të Reading në Mbretërinë e Bashkuar, qielli është bërë deri në 55% më i trazuar gjatë 40 viteve të fundit, kryesisht mbi Atlantikun e Veriut, për shkak të ngrohjes globale që ndikon në rrymat ajrore. Kjo rritje po shkakton më shumë konsumim të avionëve dhe rrezik më të madh për lëndime, megjithëse rastet fatale mbeten të rralla.
Eksperti i motit Mark Prosser theksoi se industria ajrore humbet deri në 465 milionë euro në vit vetëm në SHBA për shkak të turbulencave. Ai paralajmëroi se linjat ajrore duhet të zhvillojnë mënyra të reja për ta menaxhuar këtë fenomen.
Emirates beson se sistemi i ri i AI-së do të ofrojë të dhëna në kohë reale, duke ndihmuar pilotët të shmangin zonat e rrezikshme dhe të sigurojnë më shumë siguri dhe rehati për pasagjerët.
/vizionplus.tv
