Policia e Shtetit ka finalizuar një tjetër fazë të operacionit të koduar “The Wanted”, duke kapur në Gjermani dhe arrestuar me qëllim ekstradimin në Shqipëri një shtetas të shpallur në kërkim ndërkombëtar.
Si rezultat i bashkëpunimit të Interpol Tiranës me autoritetet gjermane, u lokalizua dhe u arrestua shtetasi H. M., 60 vjeç. Ai akuzohet se ka përvetësuar një apartament në Vlorë përmes falsifikimit të dokumenteve, të cilin më pas e ka prishur dhe në vend të tij ka ndërtuar një objekt tjetër me përmasa më të mëdha.
Gjykata e Shkallës së Parë e Juridiksionit të Përgjithshëm Vlorë, me vendimin e datës 19.06.2022, i ka caktuar H. M. masën e sigurisë “Arrest në burg” për veprat penale “Falsifikimi i dokumenteve”, “Shkatërrimi i pronës” dhe “Pastrimi i produkteve të veprës penale apo veprimtarisë kriminale”.
Sipas hetimeve, ai dyshohet se, përmes falsifikimit të lejes së ndërtimit, ka përvetësuar apartamentin e shtetasit J. M., duke e shembur më pas për të ndërtuar një objekt tjetër.
Interpol Tirana, në bashkëpunim me autoritetet gjermane, po vijon procedurat për ekstradimin e 60-vjeçarit drejt Shqipërisë.
/vizionplus.tv
