Një 37-vjeçar është arrestuar në flagrancë nga Policia e Sarandës, pasi dyshohet se shiste lëndë narkotike kokainë në lokalin që administronte, ndërsa u kap edhe me armë zjarri pa leje.
Arrestimi u bë në kuadër të operacionit policor të koduar “Administratori”, i zhvilluar pas informacioneve të siguruara në rrugë operative dhe kontrolleve të ushtruara në ambiente e subjekte të ndryshme të qytetit.
Sipas Policisë, në pranga ra shtetasi A.H., 37 vjeç, banues në Sarandë. Gjatë kontrollit në lokalin që ai administronte në lagjen nr. 4, si dhe gjatë kontrollit fizik ndaj tij, u gjetën dhe u sekuestruan një armë zjarri pistoletë me një krehër me 7 fishekë dhe një sasi lënde narkotike kokainë.
Hetimet paraprake tregojnë se kokaina dyshohet të posedohej me qëllim shitjen, ndërsa arma mbahej pa lejen përkatëse.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Sarandë për veprime të mëtejshme hetimore.
/vizionplus.tv
