Ish-deputeti i LSI, Edmond Haxhinasto shprehet se vendimi i qeverisë për vendosjen e maskave me detyrim, duhet të ishte marrë në kohën kur pandemia ishte në kulmin e saj.
Duke marrë parasysh kostot për blerjen e maskave, Haxhinasto e konsideron të nevojshme krijimin e një buxheti për të ndihmuar çdo familje shqiptare në përballimin e shpenzimeve.
“Kjo është një çështje teknike që duhet të ishte marrë në konsideratë nga ana e qeverisë kohë më para. Në mars, edhe pse ishte kulmi i pandemisë, qeveria tha: mos merrni maska. Në kohën që pandemia po relaksohet, këto bëhen të detyrueshme. Ka mungesë profesionalizmi; duhet të merren profesionistët me këtë gjë. Duhet patjerët që shtetit të japë buxhetin përkatës për çdo familje për përdorimin e maskave”, deklaroi ish-deputeti, teksa ishte i ftuar në edicionin e lajmeve në “Vizion Plus”.
Ish-deputeti u pyet edhe për miratimin e ndryshimeve në Kodin Zgjedhor pa konsensus. Sipas tij, votimi i tij dëntoi rëndë cilësinë e politikës në Shjqipëri dhe besueshmërinë para ndërkombëtarëve.
“Dëmton kredibilitetin qoftë përpara qytetarëve shqiptarë, por edhe të ndërkombëtarët, të cilët kanë hyrë garant për një Kod Zgjedhor që do ishte konsensual. Çdo veprim i tillë vetëm sa e shton dozën e revoltës ndaj kësaj qeverisje. Kjo vetëm thellon pakënaqësitë e qytetarvë ndaj një qeverie të tillë, që ka treguar që është e paaftë dhe aspak profesioniste.”
Për Haxhinaston, qytetarët janë lodhur nga kjo qeverisje dhe se më 25 prill ata do të vendosin ndryshimin.
“Kjo nuk është vendosur, por mendoj që është diçka taktike. E rëndësishme është që LSI është e angazhuar. Zgjedhjet e 25 prillit do të jenë zgjedhje, ku qytetarët do të shprehen në mënyrë plebishitare. Nuk është çështje e shifrave, por e frymës që tashmë ekziston. Qytetarët duan me patjetër ndryshim më 25 prill. Kjo është në favor të opozitës që do të sjellë ndryshime më 25 prill. Nuk ka bilanc besueshmëri kjo qeveri. Kjo qeveri nuk mendon për qytetarin, por për karrigen dhe zgjedhjet. Politikat fiskale duhen parë në tërësinë e tyre. Ne kemi dështim pëderisa vendi nuk ka arritje të qëndrueshme. Klima e biznesit ka ardhur në rënie. Hapësirat për të bërë biznes në këtë vend janë shumë të ngushta.”
