Google, do të investojë 40 miliardë dollarë në kapitalin e startup-it të Inteligjencës Artificiale Anthropic
Kompania e internetit, motori i kërkimit Google, do të investojë 40 miliardë dollarë në kapitalin e startup-it të Inteligjencës Artificiale Anthropic.
Lajmi u konfirmua nga vetë kompania, që citoi se investimi bëhet me qëllim mbështetjen e zhvillimit të tij.
Dega e Alphabet do të investojë menjëherë 10 miliardë dollarë bazuar në vlerësimin aktual të Anthropic prej 350 miliardë dollarësh, ndërsa pagesa e 30 miliardë dollarëve të mbetur do të varet nga performanca e saj.
Kompanitë në ballë të garës së inteligjencës artificiale po angazhohen në një furi shpenzimesh për të siguruar kapacitet të mjaftueshëm për të zhvilluar dhe vendosur modelet e tyre. Në fillim të shkurtit, Anthropic njoftoi se kishte mbledhur 30 miliardë dollarë, një nga marrëveshjet më të mëdha të kapitalit privat në histori.
Të hënën, Amazon u zotua zyrtarisht për 5 miliardë dollarë shtesë, pasi kishte kontribuar tashmë në tre raunde financimi me një total prej 8 miliardë dollarësh. Grupi me seli në Seattle planifikon të blejë aksione shtesë me vlerë 20 miliardë dollarë në planin afatgjatë.
Edhe pse Amazon dhe dega e saj e cloud computing, Amazon Web Services (AWS), janë partnerë historikë të Anthropic, kompania po kërkon të diversifikojë marrëdhëniet e saj të biznesit dhe po hyn në marrëveshje me grupe të tjera. Në fund të tetorit, ajo ra dakord me Google për të dhënë me qira shërbime cloud me vlerë disa dhjetëra miliardë dollarë.
Nga ana e saj, konkurrenti i madh i Anthropic, OpenAI, po vendos objektiva edhe më të larta dhe pret të shpenzojë rreth 600 miliardë dollarë deri në vitin 2030.
Anthropic dhe OpenAI janë startup-e që nuk parashikojnë fitimprurje për disa vite të tjera, ndryshe nga Google ose Meta, konkurrentë të tjerë në fushën e IA-së, aktiviteti kryesor i të cilëve gjeneron fitime të mëdha.
