Ambasadorja gjermane në Shqipëri, Suzane Schutz dhe drejtori i Përgjithshëm i Policisë së Shtetit Ardi Veliu, në prani të ministrit të Brenshëm Sandër Lleshaj, kanë nënshkruan protokollin e dhurimit të automjete dhe pajisje me vlerë rreth 200 mijë euro nga Gjermania për policinë e shtetit.
Në fjalën e saj ambasadorja Schutz theksoi se kjo tregon bashkëpunimin e mirë që ekziston mes dy vendeve.
“Sot patëm mundësinë për të dhënë një ndihmë në pajisje, me vlerë të përgjithshme prej 200 mijë eurosh, e cila tregon edhe njëherë në mënyrë simbolike, bashkëpunimin mjaft të mirë që ekziston mes dy vendeve tona, e që në të ardhmen do të konsolidohet edhe më tej.”
Nga ana tjetër ministri Lleshaj ka shprehur falenderimet e tij për ambasadoren Schutz për dhurimin e automjeteve, që do shërbejnë në luftën kundër krimit të organizuar
“Sot jemi tek Task Forca Speciale ku sapo nënshkruam një protokoll për marrjen e një ndihme të konsiderueshme, e cila i adresohet Task Forcës “Forca e Ligjit”, pra i adresohet luftës kundër krimit të organizuar. Ndërkohë që para pak javësh, ne patëm mundësinë që të mirëpresim një paketë tjetër të rëndësishme ndihme që i adresohej kufirit. Me këtë rast falënderoj Ambasadoren, falënderoj Policinë gjermane, Qeverinë gjermane për mbështetjen e vazhdueshme, një mbështetje, e cila i adresohet forcimit të parametrave të luftës kundër krimit të organizuar, i cili është parakusht i rëndësishëm për të përshpejtuar ecjen e Shqipërisë drejt hapjes së negociatave me BE.”
Ndërkohë policia bën me dije se mjetet do të përdoren kryesisht nga Policia Kriminale dhe Task Forca Speciale, e cila është ngritur për të luftuar grupet kriminale në Shqipëri ose jashtë vendit.
