Luis Enrique dhe Mikel Arteta. Finalja e madhe e Budapestit në Ligën e Kampionëve mes PSG dhe Arsenal, e cila luhet sot në 18:00 dhe transmetohet në Vizion Plus, flet spanjisht.
Vërtet përplasja në thelb është anglo-franceze, por të dy trajnerët janë të shkollës spanjolle, ish-shokë skuadre tek Barcelona madje, i pari ka eksperiencë, dhe shumë madje, sepse ka drejtuar disa ekipe të njohura dhe për më tepër e ka fituar Ligën e Kampionëve dy herë. Në 2015 me Barcelonën e madhe të Leo Messit, Xavit, Nejmar, Iniestës dhe Suarez si dhe sezonin e kaluar me PSG kur shpartalluan Interin, ndonëse finalja, finalet sipas tij nuk i ngjajnë kurrë njëra-tjetrës ndaj nuk pret të njëjtat dinamika sikurse ajo në Mynih sezonin e kaluar.
“Ata e meritonin të fitonin Premier League. Ishte një betejë e vështirë midis tyre dhe Manchester Cityt, por ata vërtetuan se janë një ekip i shkëlqyer. Mirëpo ambicia jonë për të fituar një titull të dytë është edhe më e madhe. Por kur bëhet fjalë për finalet, është gjithmonë e vështirë. Nuk mendoj domosdoshmërisht se ndryshimi midis nesh dhe Interit (5-0 në finale) sezonin e kaluar pasqyronte plotësisht nivelin e dy ekipeve, por finalet janë ndeshje të ndryshme. Gjithmonë ka shumë tension, shumë pritje”, thotë Luis Enrique.
I dyti, Mikel Arteta ka nevojë të ngjitet në nivele të larta dhe për t’ia dalë duhet të ecë në gjurmët e Luis Enriques. Edhe ai sikurse homologu i vet nuk fshihet pas gishtit por në konferencat për shtyp është shprehur hapur ambicien e tyre për diktat kontinental.
“Është një mundësi për ta jetuar këtë moment në maksimum, sepse është hera e dytë në historinë tonë që jemi këtu. Kemi mundësinë të shkruajmë një kapitull të ri në historinë e këtij klubi. Për ta bërë këtë, duhet të luajmë me qartësi, shumë guxim dhe një dëshirë të pandalshme për të fituar”, thotë Mikel Arteta.
Në fund edhe një fair play i vërtetë sportiv nga Mikel Arteta për Luis Enriquen që përpara se të jetë rival i finales është ish-shok skuadre i tij në të kaluarën si lojtar tek Barcelona.
“Ai ka qenë gjithmonë një pikë referimi që kur ishte lojtar, sepse ishte vërtet i veçantë. Në veçanti, me atë që bëri me Parisin e sheh gjurmën e tij kudo: identitetin, mentalitetin, mënyrën se si sillen lojtarët, mënyrën se si luajnë. Luis Enrique është një frymëzim.”
