Ministrja e Infrastrukturës dhe Energjisë, Belinda Balluku, e cila ditën e sotme i dorëzoi stafetën ministrit të ri të kësaj ministrie, Enea Karakaçi, ka bërë një raport të punëve dhe projekteve të realizuara gjatë kohës që ka qenë në krye të këtij institucioni. Gjatë fjalës së saj, Balluku u ndal edhe te situata e saj përballë drejtësisë, duke theksuar se beson te pavarësia e saj dhe se nuk e ka penguar dhe nuk do ta pengojë kurrë procesin e hetimit. Ajo theksoi gjithashtu se i vjen keq që situata e saj personale ka sjellë vonesa në disa procese të rëndësishme të ministrisë, ndërsa nënvizoi arritjet në sektorin energjetik dhe në ndërtimin e infrastrukturës gjatë viteve të fundit.
Balluku: Unë di të bëj punën time. Secili ka mënyrën e tij. Mund ta bëja më mirë dhe këtë nuk e vë në dyshim fare. Por as nuk e kam penguar dhe as nuk do ta pengoj kurrë drejtësinë tek e cila unë besoj dhe të cilën e kam mbështetur si pjesë integrale e një Shqipërie evropiane. Më vjen keq që situata ime personale ka krijuar vonesa në proceset jetësore që Ministria e Energjisë dhe Infrastrukturës duhet të performojë. Më vjen keq që kam ngarkuar qeverinë shqiptare në këto muaj me një peshë që nuk e meriton për shkak të të gjthë rezultateve që kjo qeveri ka sjellë në këto 12 vite. Më vjen keq për ditët dhe muajt e humbur në procese të rëndësishme që duhen çuar përpara. Kemi transformuar sektorin energjitik. Çdo ditë vetëm lajme të mira vijnë nga ai sektor. Kemi arritur të rrisim ndejshëm kapacitetet prodhuese të vendit tonë.
Kemi arritur që të ngremë bursën e parë energjitike e cila gjatë vitit 2025 ka tregtuar 42% më shumë volum krahaur me vitin 2024. Kemi kapërcyer situata të jashtëzakonshme të krizave energjitike. Shqipëria sot ndodhet në një stad të avancuar të negociatave për sa i përket kapitullit të energjisë. Kemi ndërtuar vepra të jashtëzakonshme të cilat do të qëndrojnë aty me kalimin e viteve. Ndihemi krenarë për gjithçka kemi arritur. Kemi ndërtuar rrugë e autostrada moderne të të njëjtave kategori dhe cilësi të modeleve evropiae. Kemi ndërtuar tunele të cilat nuk do t’i shkatërrojë as pika e ujit dhe asgjë nuk do të fshijë punën që kemi bërë deri më sot. Falenderoj kryeministrin Rama për besimin që më ka dhënë në këto vite, por mbi të gjitha për shembullin që ka krijuar me mënyrën e tij të lidershipit./vizionplus.tv
