Makina ka qëndruar për orë të tëra e parkuar nën diellin përvëlues të verës. Sapo hapni derën, një valë e fortë nxehtësie ju përplas në fytyrë. Reagimi i parë është i natyrshëm, ndizni kondicionerin në maksimum dhe temperaturën e vendosni në “Low”, duke kërkuar me dëshpërim pak freski.
Por kjo mënyrë e përdorimit të A/C mund të fshehë një rrezik për xhamin e përparmë.
Pse ajri i ftohtë mund të dëmtojë xhamin?
Në ditët me temperatura të larta, temperatura brenda automjetit dhe në sipërfaqet e xhamit mund të arrijë nivele shumë të larta. Kur ajri shumë i ftohtë drejtohet me intensitet të lartë mbi një xham që është nxehur nga dielli, krijohet një “shok termik”.
Ndryshimi i menjëhershëm i temperaturës mund të krijojë tensione brenda xhamit. Nëse xhami është në gjendje perfekte, mund të mos ketë problem. Por nëse ka edhe një dëmtim shumë të vogël, për shembull një goditje të padukshme nga një gur, ndryshimi i menjëhershëm i temperaturës mund të bëjë që çarja të zgjerohet me shpejtësi dhe të sjell thyerjen e xhamit.
Si ta freskoni makinën në mënyrë të sigurt?
Për të shmangur ndryshimet e menjëhershme të temperaturës, rekomandohen disa hapa të thjeshtë:
-
- Ajroseni fillimisht makinën: Hapni dyert dhe dritaret për 1-2 minuta për të larguar ajrin e nxehtë të grumbulluar.
- Ndizeni kondicionerin gradualisht: Filloni me intensitet të ulët ose mesatar dhe rriteni më pas.
- Mos e drejtoni menjëherë ajrin e ftohtë drejt xhamit: Orientoni grilat e ajrit nga trupi ose drejt dyshemesë, në vend që ta përplasni direkt mbi xhamin e përparmë.
- Mos hidhni ujë të ftohtë mbi xhamin e nxehtë
- Një tjetër gabim i zakonshëm është hedhja e ujit të ftohtë mbi xhamin e përparmë për ta ftohur shpejt
Edhe në këtë rast, ndryshimi i menjëhershëm i temperaturës mund të shkaktojë shok termik dhe të rrisë rrezikun e çarjes së xhamit, veçanërisht nëse ai ka dëmtime të vogla ekzistuese.
Parandalimi është mbrojtja më e mirë
Gjatë muajve të verës, disa masa të thjeshta mund t’ju kursejnë shpenzime dhe probleme të panevojshme. Kur hyni në një makinë që ka qëndruar gjatë nën diell, jepini pak kohë për t’u ajrosur dhe ftohur gradualisht përpara se ta vendosni kondicionerin në maksimum.
Disa minuta durim mund t’ju kursejnë një xham të ri.
/vizionplus.tv
