Zgjedhjet e fundit për pushtet lokal të zhvilluara në Medvegje konfirmuam se shqiptarët e e luginës përfundimisht e kanë humbur këtë komunë në Serbi.
Ky është konstatimi që ka bërë për emisionin “7 pa pesë” në Vizion Plus, analisti Nexhat Behluli, pjesë e botës së medias dhe biznesit në Luginën e Preshevës.
Behluli tha se me humbjen e rëndë në zgjedhjet e fundit Medvegja ra dhe definitivisht shqiptarët në Serbi nuk do të kenë më tre komuna ( Preshevën, Bujanocin dhe Medvegjen) por vetëm dy të tilla.
Ai shtoi se kjo gjë për fat të keq ishte e pritshme pasi edhe shqiptarë që banojnë në Medvegje kanë mbetur shumë pak, rreth 500 të tillë.
“Dikur në asamblene komunale në Medvegjës numri i anëtareve nga listat e partive shqiptare ishte dyshifrore ndërsa sot që flasim nga 25 anëtare në total, vetëm 3 prej tyre janë shqiptare, cka do të thotë se është pakicë minore që nuk do të ketë asnjë ndikim në vendimarrje. Aq më teper që nga 25 asambleiste, 18 i ka fituar partia e Vucic.”
Por cfarë ndikoi në këtë humbje të thellë të shqiptarëve në Medvegje në zgjedhjet e fundit lokale sipas Nexhet Behlulit?
“Kemi të bëjmë me një strategji shteterore nga Serbia për të marrë përfundimisht Medvegjen. Shlyerja e vendimit të shqiptarëve dhe heqja nga listat zgjedhore ishin akte të pastra që dëmonstruan punën e shtetit serb për tu mobilizuar totalisht në këto zgjedhje. Kjo ka qënë e qëllimshme. Edhe në zgjedhjet e kaluara, shqiptarët e Medvegjes vërtet nuk banonin në shumicë aty, ama në kohen e zgjedhjeve erdhën dhe votuan. Ndërsa këtë herë ata nuk erdhën dhe kjo për shkak të politikave shteterore serbe. Shume shqiptarë nuk e kanë marrë guximin fare që të bëjnë 100 km nga Kosova drejt Medvegjes pasi kishin frike se mos nuk e gjenin emrin në listë dhe do të bënin rrugën kot. Ka pasur shumë raste kur e kanë pasur emrin në listat online dhe pastaj kur kanë shkuar atje nga afër fizikisht, nuk e kane gjetur veten ne listë. Ka pasur ekip të posacëm nga partia e Vucic, me aktiviste të cilët kanë punuar për politika të tilla jave përpara zgjedhjeve ne Medvegje. Imagjino në zgjedhjet e 2016 në Medvegje kanë qënë 10 mijë votues, ndërsa këtë herë 6 mijë votues. Pra janë hequr 4 mijë shqiptare nga lista dhe janë shtuar 1 mijë serbe.
Behluli tha se Lugina e Preshevës e ka të pamundur të jetojë normalisht në ato vise pa ndihmën e Tiranës dhe Prishtinës zyrtare.
Ai tha se vitet e fundit ka pasur qasje me pozitive te Shqipërisë dhe Kosovës drejt Luginës ku janë bërë shumë investime ne infrastrukture. Vec këtyre projekteve, ai tha se edhe vizitat e shpeshta të ministrave dhe deputeteve nga Tirana e Prishtina, i kanë dhënë më shumë ngrohtësi shqiptarëve në Serbi.
Në fund të fundit shtoi, analisti Behluli, ky është një detyrim kushtetues i vendeve mëmë drejt Luginës.
Në fund ai lëshoi edhe një apel për të gjithë faktorin politik shqiptar në Luginë, Shqipëri dhe Kosovës.
Ai kërkoi angazhim maksimal që strategjia fituese e Serbisë në Medvegje të mos jetë e suksesshme edhe në Bujanovc, aty ku në pranverën e vitit të ardhshëm mbahen zgjedhje lokale.
“Për fat të keq duhet të pranojmë që Medvgjen e kemi humbur. Por unë gjej rastin të bëj një apel të forte që të kujdesemi për Bujanocin. Unë kam frikë se Serbia nëpërmjet mekanizmeve shtetërore do të tentoje që këtë strategji fituese që përdori në Medvegje, do të kërkoje ta vëjë në zbatim edhe në Komunen e Bujanocit. Edhe aty ka shumë emigrante dhe për fat të keq nëse zgjedhjet bëhen ne sezonin e punës kur këta banore tanët punojnë jashtë, ekziston mundësia që mekanizmat shteterore serb ti heqin nga lista dhe nga vendbanimi. Në këtë komunë ne jemi liruar nga presioni serb vetëm në dy zgjedhjet e fundit kur kemi marrë mazhorancën, dhe nuk mund ta humbasim sërish. Kjo do të ishte e rrezikshme sepse një qytet me shumicë shqiptarë nuk mund ta qeverisin serbet. Kjo do të pamundësonte zhvillimin e projekteve, do të cënonte të drejten e popullatës. Pa qasje në ekzekutiv cdo gjë do të vështirësohej.
