Kreu i demokratëve, Lulzim Basha ka zhvilluar një takim online me përfaqësuesit e lëvizjes “Diaspora për Shqipërinë e Lirë”.
Krydemokrati u shpreh se vlerësoi veçanërisht përpjekjet e aktivistëve të lëvizjes për të mundësuar votën e diasporës shqiptare, si dhe gatishmërinë për t’u përfshirë në procesin politik, zhvillimin ekonomik dhe ndërtimin e shtetit institucional të së drejtës.
‘Shqipëria ka nevojë për ta rifituar trurin e emigruar gjatë këtyre 30 viteve. Kënaqësi e veçantë të bashkëbisedoja me shqiptarë të zotë dhe me integritet, të cilët suksesi personal dhe profesional në të katër anët e botës nuk i ka larguar nga përkushtimi ndaj vendit. Dëgjova me vëmendje mendimet e aktivistëve të lëvizjes “Diaspora për Shqipërinë e Lirë” dhe vizionin e tyre për një Shqipëri demokratike, të zhvilluar dhe të integruar plotësisht në Bashkimin Europian. Vlerësova veçanërisht përpjekjen e tyre të drejtë dhe emancipuese për të mundësuar votën e diasporës shqiptare si dhe gatishmërinë për t’u përfshirë në procesin politik, zhvillimin ekonomik dhe ndërtimin e shtetit institucional të së drejtës, që ofron një avantazh shumë të madh për vendin.”
Gjatë takimit online, demokrati tha se shprehu brengën për sabotimin e votës së diasporës nga qeveria dhe rikonfirmoi angazhimin e Partisë Demokratike që të bëjë realitet votën e diasporës kur të vijë në pushtet.
“Shpreha brengën për sabotimin e qëllimshëm të votës së diasporës nga qeveria në ikje dhe rikonfirmova angazhimin tim personal dhe të Partisë Demokratike që të bëjmë realitet votën e diasporës që në zgjedhjet e para të përgjithshme pas ardhjes tonë në pushtet. Shqipëria ka nevojë për ta rifituar trurin e emigruar gjatë këtyre 30 viteve dhe koha më e volitshme për këtë është sot. #ditemetemira”
