Negociatori i Bashkimit Evropian për Brexit, Michel Barnier bëri thirrje për negociata ”pa agresivitet” me Londrën, në mënyrë që BE dhe Britania e Madhe të ruajnë marrëdhënie të qëndrueshme, sot gjatë një fjalimi në Parlamentin irlandez në Dublin.
“Nëse negociojmë në respekt reciprok, pa tone të larta, nëse do të jemi të hapur për gjetjen e zgjidhjeve, nuk ka arsye që Evropa nuk mundet të ruajë një marrëdhënie të konsoliduar me Britaninë e Madhe”, pohoi Barnier.
”Ne dëshirojmë suksesin e këtyre negociatave, të largimit të Britanisë së Madhe nga BE”, shtoi Barnier, duke nënvizuar se ky shtet, anëtar i BE përgjatë 44 vitesh duhet të mbetet një partner i afërt.
Barnier rikonfirmoi se një nga tre prioritetet në këto negociata është parandalimi i ngritjes së një kufiri ”të ashpër” mes Republikës së Irlandës dhe provincës britanike të Irlandës së Veriut.
