Ish-presidenti Bamir Topi shprehet se vendi nuk ka pësuar asnjë progres në emancipimin e klasës politike në Shqipëri dhe se vendi vuan nga mungesa e institucioneve.
Teksa komentonte situatën aktuale politike në emisionin “Kapital”, Topi deklaroi se palët politike kanë qenë gati për t’u përplasur me njëra-tjetrën dhe pohoi se sheh një lloj regeresi në mungesën e palëve.
“Kemi një riakutizim të një sëmundje kronike që politika vuan prej dekadash, janë ngjarje që përsëriten në mënyrë të njëjtë, pavarësisht se aktorët politik mund të jetën të tjerë. Nuk vlen shumë për Shqipërinë, se janë po të njëjtët aktorë. Sot vendi nuk ka drejtim institucional. Kemi mungesë të institucioneve. Vuan nga një sëmundje kronike, e shfaq këtë sindromë përmes një përplasje periodike. Palët kanë qenë gati për t’iu vërsulur njëra-tjetrës. Nuk shoh asnjë lloj progresi në emancipimin e klasës politike në Shqipëri, për më tepër shoh një regres në mungesën e dialogut politik.
Topi tha se gjuha politike po vulgarizohet dhe se Shqipëria nuk ka pasur zgjedhje të lira e të ndershmë prej dekadash.
“Gjuha politike po vulgarizohet. Duket sikur koha në Shqipëri ka mbetur në një pozicion fiks, klasa politike është betonizuar. Prej dekadash, ne nuk shohim zgjedhje të lira e të ndershme.”
