Ministria e Turizmit dhe Mjedisit Blendi Klosi dhe Ministrja e Infrastrukturës dhe Energjisë, Belinda Balluku këtë të enjte kanë qenë në kanionin e Holtës, Gramsh, gjithashtu ato janë ndalur në një bashkëbisedim të hapur në fshatin Labinot Mal, në Elbasan, për të dëgjuar shqetësimet e banorëve për burimin ujor të zonës, që ata mendojnë se kërcënohet nga “HEC Labinot Fushë” shpk.
Ministri Klosi është shprehur se ministria e Turizmit dhe Mjedisit ka ngritur një grup pune, që po analizon të gjithë problematikën e shfrytëzimit të burimeve ujore në Shqipëri, për të mos lejuar në mënyrë kategorike përdorimin e tyre në dëm të mjedisit dhe qytetarëve.
“Ne jemi këtu për të dëgjuar opinionin tuaj, jemi këtu për të kuptuar vlerat që ka i gjithë ky burim ujor nga pikëpamja e natyrës dhe jo vetëm nga pikëpamja e jetës, por sa ndikon ai në jetën e gjallesave të kësaj zone, në veprimtarinë bujqësore, sa ndikon në pyjet e kësaj zone, si ndikon në gjithë gjallërimin e jetës këtu, sa ndikon në procesin e ujitjes, sa ndikon në jetën e komunitetit. Pra, ne duam të kuptojmë nga biseda me ju, nëse vendimmarrja që është marrë deri tashmë përsa i përket HEC-it a është e drejtë apo e gabuar. Ne duam të kuptojmë nëpërmjet bisedës me ju sesa vlera ka që ne të gjejmë raportin e drejtë ku kemi mundësi për të zhvilluar industrinë dhe për të prodhuar energji të gjelbër, ku kemi mundësi që të mbrojmë mjedisin, natyrën dhe të dëgjojmë komunitetin”.
Ndërsa nga ana tjetër ministrja Balluku ka thënë se respektimi i kontratave që janë lidhur për krijimin apo zhvillimin e këtyre HEC-eve.
“Shpesh ndodh, që duke vënë HEC-et në punë kanë ngelur fshatrat pa ujë, pa ujë vaditje, pa ujë të pijshëm dhe sidomos përsa i përket blegtorisë. Ne kemi ngritur grupe pune, AKBN-ja e cila ka tagrin për të monitoruar HEC-et, bashkë me Ministrinë e Infrastrukturës dhe të Energjisë dhe me një grup të përbashkët nga Ministria e Mjedisit, kemi nisur punën për ti skanuar të gjitha këto HEC-e”.
Gjithashtu ministrja deklaroi se vendimet që do të merren tashmë nuk do të kenë asnjë kosto për buxhetin e shtetit.
