Kreu i Grupit Parlamentar të PS-së, Taulant Balla deklaroi se me konstituimin e Asamblesë javë në vijim do të bëhen publike të gjitha detajet për përgatitjen e zgjedhjeve të ardhshme.
Në një deklaratë për mediat, numri dy i socialistëve tha se konsultimet me anëtarësinë do të zhvillohen në periudhën shtator-dhjetor.
“Axhenda politike e miratuar në Kongres e ka të përcaktuar qartë që në këtë periudhën shtator, tetor, nëntor, dhjetor ne kemi një proces të rëndësishëm konsultimi me anëtarësinë dhe me çështje konsultimi që lidhen me çështjet të karakterit programor që do të konkludojnë me fitoren e zgjedhjeve të pranverës së vitit të ardhshëm për një mandat të tretë tonin me kryeministrin Rama.”
Ndër të tjera, ai theksoi se për shkak të pandemisë, Asambleja nuk mund të mblidhet si më parë.
“Asambleja nuk mund të mblidhet më siç është mbledhur historikisht, bashkë në një sallë 350 anëtarë, pasi në kushtet e pandemisë kjo është e pamundur, por ne do të zgjedhim një mënyrë të re të ndihmuar edhe nga teknologjia.”
