“Kujtesa e shtypur”, një ekspozitë historike kushtuar rrugëtimit të shtypit shqiptar në periudhën 1883–1944, është prezantuar në qytetin e Ersekës.
Kjo ekspozitë vjen nën kujdesin e studiuesit Niko Kotherja dhe sjell për publikun fotografi, dokumente, kupona abonimi, zarfe dhe elementë të tjerë autentikë që dëshmojnë historinë e shtypit. Studiuesi thekson rëndësinë e kësaj ekspozite si një mënyrë për të rikthyer në vëmendje vlerat e shtypit të hershëm shqiptar.
Ndërkohë, analisti Mentor Nazarko e cilëson këtë ekspozitë si një rikujtesë të gazetarisë në kontrast me teknologjinë e sotme.
Ekspozita “Kujtesa e shtypur” përfshin tituj të rëndësishëm të shtypit shqiptar si “Flamuri i Arbërit”, “Albania”, “Drita” e shumë të tjera, duke sjellë një pasqyrë të mediave shqiptare deri në fund të Luftës së Dytë Botërore. Historia e shtypit shqiptar nis që në vitin 1848 me botimin e gazetës “L’Albanese d’Italia” nga Jeronim de Rada, duke vijuar më pas me qindra organe shtypi të botuara brenda dhe jashtë vendit.
