Deputetët e Kuvendit të Kosovës do të mblidhen sërish sot në seancën e tretë për konstituimin e legjislaturës së nëntë parlamentare, të dalë nga zgjedhjet e 9 shkurtit.
Në seancën paraprake, kryesuesi i seancës, Avni Dehari nga Lëvizja Vetëvendosje, ftoi në konsultime përfaqësuesit e partive politike. Pas kësaj, ai e ndërpreu seancën për 48 orë për shkak të mungesës së konsensusit.
Që nga 15 prilli, kur u mbajt seanca e parë, deputetët nuk kanë arritur të kalojnë as pikën e parë të rendit të ditës, atë të verifikimit të mandateve dhe kuorumit.
Partitë opozitare argumentojnë se anëtarët e qeverisë, të cilët janë zgjedhur deputetë, duhet të kishin dhënë dorëheqje më herët, në mënyrë që të mund të betohen si deputetë të legjislaturës së re.
Por, kryeministri në detyrë, Albin Kurti, ka thënë se ekzekutivi i tij është i dorëhequr që kur i ka përfunduar mandati i plotë katërvjeçar, më 23 mars.
/vizionplus.tv
