Për rreth 2 orë parlamenti debatoi për investimin e Jared Kushner, dhëndrit të presidentit amerikan Trump, në Zvërnec dhe për protestat që prej 4 ditësh po zhvillohen kundër këtij projekti. Kryetari i partisë demokratike Sali Berisha akuzoi kryeministrin Edi Rama se synon të zhvillojë një anti-miting kundër protestuesve në Vlorë, duke e paralajmëruar të mos ndërmarrë veprime përçarëse. Por socialistët theksuan se aktiviteti i PS në sheshin e flamurit është vetëm për të festuar krijimin e kësaj force politike.
“Të marrësh nëpunësit tu dhe të dalësh në anti-miting ndaj protestës qytetare. A ka akt më përçarës? A ka akt më absurd? Është akt lufte që mafia shtetërore u shpall qytetarëve. Hiqni dorë! Anulojeni! Keni dërguar mesazhe të gjithë punonjësve të Fierit, Lushnjës, të gjithë Jugut. Njësoj si Ramiz Alia që donte të na shpallte Republikën e Vlorës, me vullnetarët e Enverit, tani e vullnetarët e Edit”, tha Berisha.
“Insistoni me padurim të merrni pjesë në festat e PS. Kemi një kalendar të parashikuar të festave tona. Nesër në Vlorë kemi një festë ditëlindjeje dhe populli i Vlorës është kryeqyteti i PS.”, u shpreh Balla.
Në lidhje më investimin në Zvërnec mazhoranca theksoi se ai do të bëhet, pasi i shërben Shqipërisë
“Ai investim do të realizohet se Shqipëria nuk e ka luksin dhe as shansin ta humbë sepse do ta vendosim aty ku na takon, në ligën e vendeve të turizmit të zhvilluar.”, tha Balla.
Edhe partia demokratike beson se investimi në Zvërnec i shërben vendit, por PD thotë se qeveria duhet të respektojë direktivat e BE për mbrojtjen e mjedisit.
“Mbrojmë tezën që në përputhje me direktivën europiane ‘Natura 2000’, dhe që unë kam besim të plotë se kjo direktivë është direktivë që plotëson të gjitha kërkesat e mjedisit… në qoftë se hapat bëhen në përputhje me direktivën europiane, unë mendoj se ato janë hapat e drejta.”, u shpreh Berisha.
Berisha pati një mesazh edhe për protestuesit që mbrëmjen e së mërkurës hodhën parulla kundër opozitës në derën e selisë së partisë demokratike
“Çdo qytetar i lirë në opozitë ka të drejtë të hedhë sloganin që do, çfarë mendon, çfarë thotë. Kurse tipat e stisur si opozitë e opozitës, ata janë mjerimi i politikës.”, tha Berisha.
Prej së dielës, çdo mbrëmje mijëra protestues kërkojnë anulimin e projektit në Zvërnec duke kërkuar dorëheqjen e kryeministrit Edi Rama.
