Europa dhe bota përkujtojnë sot 80-vjetorin e çlirimit të kampit famëkeq të Aushvicit. 50 delegacione kombëtare nga e gjithë bota, së bashku me krerë shtetesh dhe mbretër evropianë, mbërritën në Poloni, ku u zhvillua ceremonia e posaçme.
Vëmendjen kryesore e morën 50 të mbijetuarit e Holokaustit.
“Ne shohim në botën bashkëkohore sot një rritje të madhe të antisemitizmit. Është pikërisht antisemitizmi që çoi në Holokaust. Le të mos kemi frikë të demonstrojmë të njëjtin guxim sot, kur Hamasi përpiqet të mohojë masakrën e 7 tetorit. Le të mos kemi frikë të kundërshtojmë teoritë e konspiracionit që thonë se e gjithë e keqja e kësaj bote vjen nga një komplot i nisur nga disa grupe të pacaktuara shoqërore, ku hebrenjtë përmenden shpesh si një prej tyre,” tha Marian Turski, i mbijetuari i Aushvicit.
“Më kujtohet, isha një fëmijë pesë vjeç e gjysmë kur shihja nga vendi ku isha fshehur miqtë e mi të vegjël, të cilët i mblodhën dhe i çuan drejt vdekjes. Pasi u larguan të gjithë dhe oborri ishte bosh, pyesja veten: A jam unë i vetmi fëmijë hebre që ka mbijetuar? Tetëdhjetë vjet pas çlirimit, bota është përsëri në krizë. Vlerat tona të krishtera dhe hebraike janë lënë në hije në mbarë botën nga paragjykimi, frika, dyshimi dhe ekstremizmi. Antisemitizmi i shfrenuar që po përhapet midis kombeve është tronditës,” deklaroi Tova Friedman, e mbijetuara e Aushvicit.
“Më vjen thellësisht keq kur shoh në shumë vende evropiane, por edhe në vendin tonë, uniforma dhe slogane të stilit nazist që parakalojnë hapur në marshime, duke shpallur veten me krenari nacionalistë dhe duke u identifikuar me idetë naziste, me ideologjinë që vrau miliona njerëz,” u shpreh Leon Weintraub, i mbijetuari i Aushvicit.
Nga Shqipëria, në ceremoni mori pjesë ministri për Evropën dhe Punët e Jashtme, Igli Hasani.
“Ky rast solemn na sfidon të gjithëve të mësojmë nga historia, të përballemi me rritjen shqetësuese të antisemitizmit dhe të përpiqemi për një të ardhme të mishëruar nga drejtësia, humanizmi dhe paqja,” u shpreh Igli Hasani.
Kryeministri Rama reagoi gjithashtu në përkujtim të viktimave, ndërsa tha se Shqipëria, njësoj si atëherë, edhe tani qëndron kundër antisemitizmit dhe islamofobisë.
“Kujtojmë me krenari se falë guximit të gjyshërve dhe nënave tona (pothuajse të gjithë myslimanë), Shqipëria, një komb i vogël me një zemër të madhe, u bë një strehë, duke dalë nga Lufta e Dytë Botërore si vendi i vetëm evropian me më shumë hebrenj sesa para saj,” tha Edi Rama, kryeministër i Shqipërisë.
Në kampin vdekjeprurës të Aushvicit, nazistët vranë mbi një milion hebrenj nga më shumë se 6 milionë viktima të Holokaustit. /vizionplus.tv
