Rebelët sirianë janë tani vetëm 20 kilometra nga kryeqyteti Damask pasi kanë marrë kontrollin e provincës Daraa në Sirinë jugore, tha një komandant dhe Observatori joqeveritar Sirian për të Drejtat e Njeriut (OSDH).
Rami Abdel Rahman, drejtori i OSDH, i tha AFP se luftëtarët rebelë kontrollojnë të gjithë Deraan, djepin e kryengritjes së vitit 2011 kundër regjimit të Bashar al-Assad.
Një nga komandantët e tyre, Hassan Abdel Ghani, konfirmoi se ata janë “më pak se 20 kilometra” nga hyrja jugore e Damaskut.
“Forcat tona kanë filluar fazën përfundimtare të rrethimit të kryeqytetit Damask,” tha Gani.
Ministria e Mbrojtjes, megjithatë, e mohoi këtë, duke thënë se “informacionet sipas të cilave, forcat tona të armatosura, të pranishme në të gjitha zonat e fshatit të Damaskut, janë tërhequr, janë të pabazuara”.
Pas rënies së Alepos javën e kaluar, forcat qeveritare po shemben në të gjithë vendin me shpejtësi marramendëse ndërsa rebelët kapin njëri pas tjetrit disa qytete të mëdha dhe rishfaqen në zonat ku mendohej se kryengritja ishte shtypur prej vitesh.
Si dhe Alepo në veri, Hama në Sirinë qendrore dhe Deir Ezzor në lindje, rebelët thonë se kanë pushtuar gjithashtu Quneitra, Deraa dhe Sweida në jug dhe po përparojnë drejt kryeqytetit Damask.
Forcat qeveritare janë përqendruar në Homs.
Sipas Observatorit, shtatë civilë u vranë nga sulmet siriane dhe ruse në Homs.
Ndërkohë, rebelët po zgjerojnë kontrollin e tyre mbi pothuajse të gjithë Sirinë jugperëndimore dhe thonë se kanë kapur Sanamain. Ushtria siriane thotë se po ridislokohet, pa e pranuar se ka humbur terren.
Shpejtësia me të cilën po zhvillohen ngjarjet ka habitur shumicën e vendeve arabe dhe po shkakton një valë të re shqetësimi për stabilitetin e rajonit. Katari tha sot se integriteti territorial i Sirisë është nën kërcënim.
Lufta civile e Sirisë, e cila shpërtheu në vitin 2011 si një kryengritje kundër regjimit të Asadit, krijoi hapësirë për xhihadistët për të kapur zona të mëdha toke dhe për të nisur sulme terroriste në mbarë botën, ndërsa në të njëjtën kohë shtatë milionë refugjatë u larguan në vendet fqinje.
Zyrtarët perëndimorë thonë se ushtria siriane është në një pozitë të vështirë, e paaftë për të ndaluar rebelët dhe e detyruar të tërhiqet.
Assad prej vitesh është mbështetur te aleatët e tij për të shtypur kryengritësit: avionët luftarakë rusë bombarduan nga ajri ndërsa Irani dërgoi aleatët e vet, luftëtarë nga Hezbollahu dhe grupet paramilitare irakiane, për të forcuar forcat tokësore.
Por Rusia që nga viti 2022 është fokusuar në luftën në Ukrainë dhe Hezbollahu ka pësuar humbje të mëdha në luftën e vet me Izraelin, duke kufizuar rëndë aftësitë e tij.
Të premten, Rusia u bëri thirrje qytetarëve të saj të largohen nga Siria. Irani ka dëbuar familjet e diplomatëve të tij, sipas një zyrtari.
Paraushtarakët irakianë, të mbështetur nga Irani, janë vënë në gatishmëri dhe mijëra prej tyre janë gati të vendosen në Siri dhe janë mbledhur pranë kufirit.
Në Doha të Katarit kanë nisur bisedimet mes ministrave të jashtëm të Iranit, Rusisë dhe Turqisë për të diskutuar situatën në Siri.
Ministri iranian Abbas Araghsi i tha televizionit iranian se “nuk janë marrë vendime konkrete” për të ardhmen e Sirisë dhe se takimi i Dohas synon të sigurojë integritetin territorial të vendit.
