Rusia është e gatshme për një zgjidhje politike dhe diplomatike të konfliktit në Ukrainë, por duke pasur parasysh faktin se vendet perëndimore nuk vlerësojnë interesat e Moskës dhe realitetet mbizotëruese në terren, ende nuk ka opsione të dukshme për një marrëveshje, tha ministri rus i Jashtëm Sergei Lavrov.
“Ne mbetemi të hapur për një zgjidhje politike dhe diplomatike që do të bazohet në marrjen në konsideratë të interesave tona legjitime, që do të bazohet në shqyrtimin e realiteteve që janë zhvilluar gjatë shumë viteve dhe që tani kanë çuar në situatën aktuale”, tha Lavrov duke folur në Dumën e Shtetit.
“Megjithatë, në mungesë të propozimeve serioze nga ata që na shpallën luftë dhe duke marrë parasysh hezitimin e tyre për të vlerësuar ose interesat tona ose realitetet në terren, ende nuk është e mundur të ulemi në tryezën e bisedimeve. Opsione të tilla nuk janë të dukshme”, shtoi Lavrov.
Lavrov theksoi se Perëndimi nuk flet më për fitoren e tij, por se si nuk do ta lërë Putinin të fitojë.
“Uashingtoni dhe aleatët e tij nuk heqin dorë nga ëndrrat e tyre për të na shkaktuar një disfatë strategjike. Megjithatë, duke parë veprimet e suksesshme të ushtrisë ruse në Ukrainë, Perëndimi nuk po flet më për fitoren e tij, por se si të mos lejohet Putini të fitojë”, tha ministri rus.
Më pas, ministri i Jashtëm rus foli për përpjekjet e dështuara, siç i cilësoi ai, të Perëndimit për të izoluar vendin e tij.
“Në kontekstin e rritjes së mirëkuptimit të ndërsjellë me vendet e Lindjes dhe Jugut, duket hapur që planet e Perëndimit për të izoluar Rusinë kanë dështuar”, tha ai, duke shtuar se vetë mbështetësit e nismave anti-ruse janë të detyruar të pranojnë këtë. /vizionplus.tv
