Zjarri në landfillin e Bushatit në Shkodër vijon të jetë aktiv edhe sot, pasi flakët kanë vazhduar gjatë gjithë natës dhe janë përhapur në një sipërfaqe të konsiderueshme, duke vështirësuar ndërhyrjen e forcave zjarrfikëse.
Sipas raportimeve nga terreni, mbi 20 efektivë të zjarrfikëses kanë punuar gjatë orëve të vona të natës për shuarjen e vatrave, duke përdorur ujë dhe hedhje dherash.
Megjithatë, intensiteti i zjarrit ka bërë që situata të mbetet problematike.
Gazetari i Vizion Plus Bepin Kolvata raporton se gjatë ditës së sotme, ekipet e emergjencës janë rikthyer në zonë për të vijuar operacionet e fikjes së flakëve. Sasia e madhe e mbetjeve në landfill ka favorizuar përhapjen e zjarrit dhe e ka bërë ndërhyrjen më të vështirë.
Autoritetet synojnë që ndërhyrja të përfundojë brenda orëve të drekës, me shpresën që të mos ketë riaktivizim të vatrave të tjera, ndërsa situata mbetet ende nën monitorim.
/vizionplus.tv
