Ministria e Jashtme e Iranit ka deklaruar se aktualisht nuk ekziston asnjë plan për një raund të ri negociatash me Shtetet e Bashkuara të Amerikës, duke akuzuar Uashingtonin për shkelje të marrëveshjeve dhe veprime armiqësore gjatë bisedimeve të mëparshme.
Zëdhënësi i Ministrisë së Jashtme iraniane, Esmail Baghaei, u shpreh se SHBA nuk ka nxjerrë mësime nga përvojat e kaluara dhe se qëndrimi i saj nuk ndihmon në arritjen e rezultateve pozitive. Sipas tij, Teherani nuk po shqyrton për momentin nisjen e një procesi të ri dialogu me palën amerikane.
Ai pretendoi gjithashtu se SHBA ka shkelur marrëveshjet që në momentet e para të zbatimit të tyre, duke përmendur vendosjen e një bllokade detare dhe ndërmarrjen e veprimeve që, sipas tij, bien ndesh me të drejtën ndërkombëtare.
Baghaei shtoi se Irani ka informuar për këto zhvillime edhe ndërmjetësin pakistanez, duke akuzuar SHBA për sulme ndaj anijeve dhe infrastrukturës iraniane, si dhe për pasoja në jetë njerëzish.
Më tej, ai bëri të ditur se një propozim me dhjetë pika ishte diskutuar në Islamabad, ndërsa theksoi se Ngushtica e Hormuzit ishte e sigurt përpara sulmeve që Irani ia atribuon SHBA-së dhe Izraelit.
Në përfundim, zëdhënësi iranian akuzoi Uashingtonin se po përpiqet të zhvendosë përgjegjësinë te Irani dhe se nuk po tregon seriozitet në negociata, duke shtuar se, sipas tij, SHBA vijon të mbajë një qëndrim të njëanshëm dhe akuzues.
