Një zjarr i madh ka përfshirë një vendbanim bregdetar në ishullin Borneo në Malajzi, duke shkatërruar rreth 1,000 shtëpi dhe duke lënë të pastrehë mbi 9,000 banorë, njoftuan autoritetet.
Flakët shpërthyen herët të dielën në distriktin Sandakan dhe u përhapën me shpejtësi në një zonë të mbushur me banesa prej druri të ndërtuara mbi shtylla në det. Sipas shërbimit zjarrfikës, përhapja e zjarrit u favorizua nga erërat e forta dhe afërsia e madhe e shtëpive me njëra-tjetrën.
Autoritetet thanë se ndërhyrja e ekipeve të emergjencës u vështirësua nga rrugët e ngushta, si dhe niveli i ulët i baticës që pengoi aksesin në ujë për shuarjen e flakëve. Pavarësisht përmasave të mëdha të dëmeve, nuk janë raportuar viktima.
Banorët janë zhvendosur në strehime të përkohshme, ndërsa qeveria federale dhe autoritetet lokale po koordinojnë ndihmat emergjente për familjet e prekura, deklaroi kryeministri Anwar Ibrahim.
“Vendbanimet mbi ujë”, ku jetojnë kryesisht komunitete me të ardhura të ulëta dhe grupe të margjinalizuara, konsiderohen zona me rrezik të lartë zjarri për shkak të ndërtimit prej druri dhe mungesës së infrastrukturës bazë. Shkaqet e zjarrit mbeten ende nën hetim.
/vizionplus.tv
