Përgjegjësi dhe organizatori i sulmeve të 24 shtatorit në Banjskë të Zveçanit, Milan Radoiçiç është liruar nga burgu në Serbi.
Edhe pse autoritetet serbe njoftuan për një ndalim 48 orësh, pa kaluar ende as gjysma e tyre ai është lënë i lirë, pasi gjyqtari refuzoi propozimin e Prokurorisë së Lartë Publike në Beograd për caktimin e paraburgimit.
Ish-nënkryetarit të Listës serbe është lënë në arrest shtëpie, i është ndaluar hyrja në Kosovë si dhe dalja nga territori i Serbisë.
Radoiçiç u ndalua një ditë më parë, në një kohë që Serbia është vënë nën presionin e ndërkombëtarëve për sulmet terroriste të 24 shtatorit.
Ai dyshohet se së bashku me disa persona të tjerë, identiteti it ë cilëve ende nuk është bërë i ditur, ka prodhuar, trafikuar apo shitur armë të kalibrit të rëndë. Ai gjithashtu dyshohet për kryerjen e veprime kundër sigurisë.
Gjatë javës së kaluar Radoiçiç dha dorëheqjen nga posti nënkryetarit të Listës Serbe dhe mori përgjegjësinë për organizimin e sulmit ndaj policisë së Kosovës në Banjskë.
Ndërsa arrestimi i tij erdhi rreth 10 ditë pas ngjarjeve të 24 shtatorit, ku mbeti i vrarë oficeri i policisë Afrim Bunjaku dhe tre sulmues serbë.
