Spiro Brumbulli sekretar i shoqatës së bankave është i mendimit se nuk ka ilaç tjetër për të luftuar inflacionin, përveç mekanizmit të politikës monetare që aplikon Banka e Shqipërisë.
I ftuar në emisionin E-ZONE në Vizion Plus, Brumbulli thotë se me këtë nivel inflacioni banka mund të ndërhyjë sërish deri në fund të vitit dhe se norma bazë e interesit të mund të arrijë në 3% nga 2.25% që u miratua në mbledhjen e fundit të këshillit mbikqyrës.
“Është e qartë, nuk ka ilaç tjetër për të frenuar inflacionin përveç “lojës” që bëhet me normën bazë të interesit të lekut. Kur inflacioni rritet ajo që duhet bërë është që konsumi të bëhet më pak i leverdisshëm, kjo do të sjellë një frenim të rritjes së mëtejshme të çmimeve. Kjo do të sjellë një cënim të rritjes ekonomike, ky është një debat i hershëm mes ekonomistëve. Në raste të tilla askush nuk mund të bëjë një parashikim se kur do të ndalet rritja e çmimeve, ndaj ajo që duhet të kuptojë çdo individ dhe biznes është që nuk është koha për investime të reja dhe konsum të ri”, – u shpreh Brumbulli
Banka e Shqipërisë që nga muaji Mars i këtij viti ka ndërhyrë katër herë duke rritur normën bazë të lekut nga 0.5 që ishte, në 2.25% aktualisht. Inflacioni nga ana tjetër nuk po ndalet, ndërsa presionet mbeten ende të larta, pasi çmimi i naftës po jep një kontribut kryesorë në rritjen e tij.
