Partia Demokratike ka dorëzuar pranë Prokurorisë së Posaçme kundër Korrupsionit një kallëzim të ri penal, që përfshin të gjitha gjetjet e raportit final të Komisionit Hetimor, i cili u rrëzua në Parlament.
Ish-kryetarja e Komisionit, Jorida Tabaku, deklaroi se pas skemës së inceneratorëve qëndron një grup i strukturuar kriminal dhe PD ka përfshirë në kallëzim 50 persona, duke nisur nga kryeministri, ministrat, kryetarë bashkie dhe përfaqësues të kompanive.
JORIDA TABAKU
NENKRYETARE E PD
“Të mos ketë dosje të veçanta për hetimin. Të hetohen në një hetim të vetëm. Grupi ka funksionuar si një i vetëm. Kompanitë kanë marrë kredi bankare dhe janë pa eksperiencë. Të hetohen së bashku të 50 individët. Janë po të njëjtët individë që kontrollojnë dhe zbatojnë kontratat.”
Tabaku ka theksuar se edhe në këtë situatë krize, qeveria vazhdon paguan inceneratorët.
“Për ta kuptuar shqiptarët; nëse sot qeveria ka vendosur që të indeksojë pensionet aq sa është norma e interesit, për 1/3 e pensionistëve, ka vendosur gjithashtu që të paguajë para ekstra nga taksat e juaja për t’i paguar në indeksim koncesionarit të inceneratorëve.”
Edhe pse inceneratorët kanë qenë kryefjala e aksioni opozitar, raporti i hartuar nga Jorida Tabaku mori 4 vota kundër nga deputetët e PD.
“Keqardhje që deputetë të PD bashkojnë votën me Edi Ramën. Unë nuk shprehem dot se janë të shitur, u shpreh Tabaku, nuk e kam këtë edukim politik. Ato mund të kishin shmangur votën duke abstenuar nëse unë jam treguar jo korrekte me raportin duke mos ua dhënë. Por ato zgjodhën të bashkojnë votën me Edi Ramën.”
Por ditën që u votua raporti, edhe pse inceneratorët janë çështje më e rëndësishme e PD, ra në sy se më shumë se 20 deputetë, përfshi edhe numrin 2 të Partisë Demokratike Gazment Bardhin, nuk shkuan të votonin në seancë.
“Ndjej keqardhje që disa deputetë nuk ishin në sallë për ta votuar.”
Një prej anëtarëve të Komisionit Hetimor, Belind Këlliçi ka shpjeguar se votoi kundër raportit, pasi ai nuk u përfshi në hartimin e tij, e madje iu dha një kopje e raportit vetëm pak minuta para seancës plenare.
