Kryesuesja e listës së kandidatëve të PS në Qarkun e Tiranës, Luljeta Bozo, në takimin me të rinjtë dhe gratë, ku i pranishëm është edhe kryeministri Edi Rama, tha se Partia Socialiste është e vetmja forcë politike që ka besuar në forcën e gruas.
Gjatë fjalës së saj, Bozo i ftoi që në 25 prill të votojnë PS-në, pasi, sipas saj, bëri të mundur përfaqësim më të lartë të grave në qeveri.
“Ne jemi gjysma e shoqërisë dhe pa këtë gjysmë nuk mund të eci shoqëria. PS është e vetmja që beson te forca jonë, me vepra jo me fjalë. Në qeverinë e PS ka kaq shumë gra ministre, ka marrë politika lehtësuese për gra dhe vajza që duan të futen në tregun e punës, për t’i dhënë fund atyre shfaqjeve të shëmtuara që ndodhin herë pas here në shoqërinë tonë. Është një forcë që ka besim në fuqinë ripërtëritëse që ka gruaja. Ju ftoj të gjithave të bëjmë të pamundurën që të dalim të gjithë në votime dhe të votojmë për PS sepse votojmë për familjen tonë, për të ardhmen tonë”, tha Bozo.
