Konferenca botërore e klimës përfundoi një ditë më parë në Madrid dhe reflektoi një zhgënjim të madh për të gjitha vendet pjesëmarrëse. Pas bisedimeve të zgjatura, palët nuk mundën të bien dakord se si duhet të zbatohet në praktikë neni 6 i Marrëveshjes së Parisit. Ky nen ka të bëjë me bashkëpunimin midis vendeve për të arritur së bashku qëllimet e mbrojtjes së klimës. Sekretari i përgjithshëm i Kombeve të Bashkuara, Antonio Guterres tha se kjo ishte një mundësi e humbur për të vepruar.
“Jam i zhgënjyer nga rezultatet e konferencës për klimën. Komuniteti ndërkombëtar humbi një mundësi të rëndësishme për të treguar ambicie në rritje për zbutjen, adaptimin dhe financat për të trajtuar krizën klimatike. Deklarata e fundit e samitit shpreh nevojën urgjente për angazhime të reja rreth këtyre çështjeve.”
Nga këndvështrimi i organizatës për mbrojtjen e mjedisit, Greenpeace, fajtorë për dështimin e rregullave më ambicioze janë para së gjithash SHBA dhe Brazili. Për Shtetet e Bashkuara kjo ishte gjithsesi konferenca e fundit për Marrëveshjen e Parisit, pas vendimi te presidentit Trump per tu larguar. Ndërsa presidenti brazilian Jair Bolsonaro e konsideron pyllin e Amazonës, i cili ka rëndësi thelbësore për klimën globale, si burim të ekonomisë braziliane.
Në konferencën e klimës në Paris në vitin 2015, të gjitha vendet pjesëmarrëse ranë dakord për një marrëveshje ndërkombëtare, që synon të marrë masa për të kufizuar ngrohjen globale në më pak se dy gradë Celsius.
