Ish-kreu i SHISH, Fatos Klosi, ka komentuar zhvillimet e fundit në drejtësi, duke u ndalur te çështjet që lidhen me zyrtarë të lartë dhe kohëzgjatjen e paraburgimit.
I ftuar në studion e QUO VADIS, ai u shpreh kritik ndaj mënyrës së veprimit të prokurorisë, duke theksuar se mbajtja për periudha të gjata në paraburgim nuk është normale.
Duke iu referuar rastit të Ilir Meta, Klosi tha se i erdhi keq kur e pa në gjyq, ndërsa shtoi se 18 muaj në paraburgim për një ish-president është një praktikë e diskutueshme.
Sipas tij, nëse ka shkelje, dënimi duhet të jepet pas një procesi të plotë gjyqësor dhe jo të zëvendësohet me masa të gjata sigurie.
“Më erdhi keq për pamjen e Metës. U mundua ta mbrojë veten e tij. Di që akuzohet për shumë gjëra, por për mua duhet një vendim i formës së prerë. Por më erdhi keq. Kam bashkëpunuar me të dhe për mua ishte shumë serioz“, tha Klosi.
“Mënyra si po sillet prokuroria nuk është normale, që mbahen në paraburgim 1 vit e gjysmë ish-presidenti i vendit, kryetari i bashkisë së kryeqytetit, mbahen ministra. U dashkan vite të tëra që një ministër të konsiderohet fajtor, të ketë mbaruar edhe Apelin që të jetë i formës së prerë. Nëse kanë gabuar, të marrin dënimin që meritojnë, por jo të mbahen kaq gjatë, sepse krijon mendim të gabuar në popull. Kjo ndodh për shkak të tranzicionit. SHIK nuk ka qenë i pjekur. Ne u munduam, por ne nuk dënonim njerëz. SHIK nga një institucion që ishte mbledhje informacioni kishte edhe kompetenca ekzekutive. I hoqëm kompetencat për të arrestuar njerëz. Ndërkohë që prokuroria mori vrull, u pëlqye nga njerëzit që ra ajo e pandëshkueshmërisë. Nuk është normale të rrijë kaq gjatë në paraburgim. Prokuroria pretendon që, po doli jashtë, prish prova. Çfarë do t’u bëjë provave për një ngjarje para 15 viteve? Ka dëshmitarë, ka dokumente”, shtoi Klosi.
/vizionplus.tv
