Ministrja e Drejtësisë, Znj.Etilda Gjonaj ka pritur këtë të shtunë në takim një delegacion të Ministrisë së Brendshme të Mbretërisë së Bashkuar, i cili kryesohej nga Sekretari i Përhershëm i Ministrisë së Brendshme z.Philip Rutnam dhe shoqërohej nga ambasadori i Britanisë së Madhe në Shqipëri, z.Duncan Norman.
Sipas njoftimit të zyrës së shtypit të Minsitrisë së Drejtësisë, temat kryesore të diskutimit kanë qenë forcimi i luftës kundër krimit të organizuar transnacional dhe terrorizmit, përmes shkëmbimit të informacionit si dhe mbështetjes së reformës të sistemit penitenciar, me synim rritjen e sigurisë së brendshme.
Ministrja e Drejtësisë tha se Qeveria Shqiptare ka treguar me rezultate konkrete se angazhimi në luftën kundër krimit të organizuar transnacional është një angazhim serioz edhe në kuadër të procesit të integrimit në Bashkimin Evropian.
Në përgjigje të interesimit të delegacionit britanik, Ministrja Gjonaj ka bërë një ekspoze të ecurisë dhe rezultateve të deritanishme të Reformës në Drejtësi, duke e vënë theksin te ngritja e institucioneve të reja si Prokuroria e Posaçme dhe Byroja Kombëtare e Hetimit, të cilat do të krijojë kushtet e duhura për ndjekjen dhe hetimin e veprave penale të korrupsionit dhe krimit të organizuar në nivelet e larta të politikës dhe administratës publike.
Reforma në sistemin penitenciar dhe masat më të fundit që ka ndërmarrë Qeveria Shqiptare për forcimin e sistemit të sigurisë në burgje ka qenë një tjetër çështje e rëndësishme e diskutuar. Ministrja Gjonaj ka theksuar se me ndryshimet e fundit ligjore parashikohet vendosja në një regjim të veçantë izolimi për të dënuarit për vepra penale të krimit të organizuar apo terrorizmit, duke marrë si model sistemin italian “41-bis”.
Ndërkohë, nga ana e tjetër, z. Rutnam shprehu gadishmërinë e plotë të Qeverisë Britanike për të vijuar me mbështetjen e programit të reformimit të sistemit penitenciar.
